ਸੱਤ ਅਮਰੀਕੀ ਨਾਗਰਿਕ ਹਾਲੇ ਵੀ ਹਿਰਾਸਤ ਵਿਚ
ਵਾਸ਼ਿੰਗਟਨ, 21 ਮਾਰਚ – ਟਰੰਪ ਪ੍ਰਸ਼ਾਸਨ ਅਤੇ ਕਤਰ ਦੇ ਵਾਰਤਾਕਾਰਾਂ ਦੇ ਯਤਨਾਂ ਤੋਂ ਬਾਅਦ ਅਫਗਾਨਿਸਤਾਨ ਵਿਚ ਤਾਲਿਬਾਨ ਨੇ ਦੋ ਸਾਲ ਤੋਂ ਵੱਧ ਸਮੇਂ ਪਹਿਲਾਂ ਹਿਰਾਸਤ ਵਿਚ ਲਏ ਗਏ ਇਕ ਅਮਰੀਕੀ ਨਾਗਰਿਕ ਨੂੰ ਰਿਹਾਅ ਕਰ ਦਿਤਾ ਹੈ। ਅਮਰੀਕੀ ਵਿਦੇਸ਼ ਵਿਭਾਗ ਨੇ ਵੀਰਵਾਰ ਨੂੰ ਇਕ ਬਿਆਨ ਵਿਚ ਇਹ ਜਾਣਕਾਰੀ ਦਿਤੀ। ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਏਅਰਲਾਈਨ ਮਕੈਨਿਕ 65 ਸਾਲਾ ਜਾਰਜ ਗਲਾਜ਼ਮੈਨ, ਆਪਣੀ ਪਤਨੀ ਨੂੰ ਮਿਲਣ ਲਈ ਵਾਪਸ ਅਮਰੀਕਾ ਜਾ ਰਿਹਾ ਸੀ। ਗਲਾਜ਼ਮੈਨ ਨੂੰ ਦਸੰਬਰ 2022 ਵਿਚ ਤਾਲਿਬਾਨ ਨੇ ਉਸ ਸਮੇਂ ਹਿਰਾਸਤ ਵਿਚ ਲੈ ਲਿਆ ਸੀ ਜਦੋਂ ਉਹ ਇਕ ਸੈਲਾਨੀ ਵਜੋਂ ਅਫਗਾਨਿਸਤਾਨ ਦੀ ਯਾਤਰਾ ਕਰ ਰਿਹਾ ਸੀ।
ਪੁਤਿਨ ਨੇ ਯੂਕ੍ਰੇਨੀਆਂ ਨੂੰ 10 ਸਤੰਬਰ ਤੱਕ ਰੂਸ ਛੱਡਣ ਦਾ ਦਿਤਾ ਅਲਟੀਮੇਟਮ
ਉਹ ਜਨਵਰੀ ਤੋਂ ਬਾਅਦ ਤਾਲਿਬਾਨ ਦੁਆਰਾ ਰਿਹਾਅ ਕੀਤਾ ਗਿਆ ਤੀਜਾ ਅਮਰੀਕੀ ਨਾਗਰਿਕ ਹੈ। ਪਹਿਲੇ ਦੋ ਨੂੰ ਪਿਛਲੇ ਅਮਰੀਕੀ ਜੋਅ ਬਾਈਡੇਨ ਪ੍ਰਸ਼ਾਸਨ ਦੇ ਆਖਰੀ ਦਿਨਾਂ ਵਿਚ ਰਿਹਾਅ ਕੀਤਾ ਗਿਆ ਸੀ। ਵਾਲ ਸਟਰੀਟ ਜਰਨਲ ਨੇ ਅਮਰੀਕੀ ਅਧਿਕਾਰੀਆਂ ਦੇ ਹਵਾਲੇ ਨਾਲ ਕਿਹਾ ਕਿ ਤਾਲਿਬਾਨ ਨੇ ਆਪਣੀ ਪਿਛਲੀ ਮੰਗ ਨੂੰ ਛੱਡ ਦਿਤਾ ਹੈ ਕਿ ਅਮਰੀਕਾ ਕੈਦ ਕੀਤੇ ਤਾਲਿਬਾਨ ਮੈਂਬਰਾਂ ਨੂੰ ਸੌਂਪੇ ਅਤੇ ਵਾਸ਼ਿੰਗਟਨ ਨਾਲ ਬਿਹਤਰ ਸਬੰਧਾਂ ਦੇ ਬਦਲੇ ਗਲਾਜ਼ਮੈਨ ਨੂੰ ਰਿਹਾਅ ਕਰਨ ਲਈ ਸਹਿਮਤ ਹੋ ਗਿਆ। ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਸੱਤ ਅਮਰੀਕੀ ਅਜੇ ਵੀ ਅਫਗਾਨਿਸਤਾਨ ਵਿਚ ਹਿਰਾਸਤ ਵਿਚ ਹਨ, ਜਿਨ੍ਹਾਂ ਵਿਚੋਂ ਇਕ ਦੀ ਮੌਤ ਹੋ ਗਈ ਹੈ। ਕਤਰ ਨੇ ਸਾਲਾਂ ਤੋਂ ਅਮਰੀਕਾ ਅਤੇ ਤਾਲਿਬਾਨ ਵਿਚਕਾਰ ਗੱਲਬਾਤ ਦੀ ਮੇਜ਼ਬਾਨੀ ਕੀਤੀ ਹੈ।
